१४ असार २०८३,
काठमाडौं।फ्रान्समा पहिलो पटक इबोला भाइरस संक्रमण पुष्टि भएको छ। डेमोक्रेटिक रिपब्लिक अफ कङ्गो (डीआर कङ्गो) मा मानवीय सहायता अभियानमा सहभागी भएर फर्किएका एक चिकित्सकमा इबोला संक्रमण पुष्टि भएको फ्रान्सको स्वास्थ्य मन्त्रालयले जनाएको छ। संक्रमित चिकित्सकलाई तत्काल विशेष उपचार केन्द्रमा भर्ना गरिएको छ र उनको स्वास्थ्य अवस्था स्थिर रहेको बताइएको छ।
फ्रान्सका स्वास्थ्य अधिकारीहरूले सर्वसाधारणमा संक्रमण फैलिने जोखिम अत्यन्त न्यून रहेको बताएका छन्। संक्रमित चिकित्सकसँग सम्पर्कमा आएका व्यक्तिहरूको पहिचान गरी निगरानीमा राख्ने तथा सम्पर्क पहिचान (कन्ट्याक्ट ट्रेसिङ) प्रक्रिया सुरु गरिएको छ।
हाल डीआर कङ्गोमा फैलिएको इबोला प्रकोपमा एक हजारभन्दा बढी संक्रमित भेटिएका छन् भने २६० भन्दा बढीको मृत्यु भइसकेको छ। यो प्रकोप दुर्लभ बुन्डिबुग्यो प्रजातिको इबोला भाइरसका कारण फैलिएको हो, जसका लागि हालसम्म स्वीकृत खोप उपलब्ध छैन।
विश्व स्वास्थ्य संगठन (डब्लुएचओ) ले फ्रान्समा देखिएको संक्रमणका कारण आत्तिनुपर्ने अवस्था नरहेको जनाएको छ। डब्लुएचओका महानिर्देशक टेड्रोस अधानोम गेब्रेयेससका अनुसार अफ्रिकाबाहिर इबोलाका घटना अत्यन्त दुर्लभ हुने भएकाले विश्वव्यापी जोखिम अझै न्यून छ।
डीआर कङ्गोका इटुरी, उत्तर किभु र दक्षिण किभु प्रान्तमा संक्रमण तीव्र रूपमा फैलिरहेको छ। विशेषगरी इटुरी प्रदेश संक्रमणको मुख्य केन्द्र बनेको छ। पूर्वी डीआर कङ्गोमा जारी द्वन्द्व र असुरक्षाका कारण प्रकोप नियन्त्रण अभियान थप चुनौतीपूर्ण बनेको स्वास्थ्य अधिकारीहरूको भनाइ छ।
स्रोत: BBC
About the Author
