नेपालगञ्ज । विश्व वातावरण दिवसको अवसरमा बास नेपालको आयोजनामा बाँकेका विभिन्न स्थानमा वातावरण संरक्षणसम्बन्धी सचेतनामूलक सडक नाटक प्रदर्शन गरिएको छ।
वातावरण संरक्षण, फोहोर व्यवस्थापन, प्लास्टिकजन्य वस्तुको अत्यधिक प्रयोगबाट हुने नकारात्मक असर, जलवायु परिवर्तन तथा वातावरणीय संकटबारे जनचेतना अभिवृद्धि गर्ने उद्देश्यले सडक नाटक प्रस्तुत गरिएको बास नेपालले जनाएको छ।
कोहलपुर नगरपालिकाको समन्वयमा कोहलपुर बजार क्षेत्रमा तथा डिभिजन वन कार्यालय बाँकेको सहयोगमा नेपालगञ्जस्थित मंगल प्रसाद नमुना माध्यमिक विद्यालय र महेन्द्र पार्कमा नाटक प्रदर्शन गरिएको थियो। नाटकमार्फत बढ्दो प्लास्टिक प्रदूषण, अव्यवस्थित फोहोर व्यवस्थापन, वन विनाश, जलवायु परिवर्तनका असर तथा वातावरण संरक्षणमा नागरिकको भूमिकाजस्ता विषयलाई जीवन्त रूपमा प्रस्तुत गरिएको थियो।
कलाकारहरूले मनोरञ्जनात्मक शैलीमा वातावरणीय चुनौती र समाधानका उपायहरू प्रस्तुत गर्दै वातावरण जोगाउने जिम्मेवारी सबैको साझा दायित्व भएको सन्देश दिएका थिए।
सडक नाटकमा मन भण्डारी, माधव कार्की, शोभा भण्डारी, राष्ट्रिय बुढा, लोकबहादुर घर्ती, सुमिता कुमाल र शोभा चौधरीले अभिनय गरेका थिए। कलाकारहरूको प्रभावकारी प्रस्तुतिले दर्शकहरूको ध्यान आकर्षित गरेको आयोजकले जनाएको छ।
कार्यक्रममा ६ सयभन्दा बढी विद्यार्थी, युवा, स्थानीय बासिन्दा तथा सरोकारवालाहरूको सहभागिता रहेको थियो। नाटक अवलोकनपछि वातावरण संरक्षणका लागि अपनाउन सकिने व्यवहारिक उपायहरूबारे छलफल समेत गरिएको थियो।
कार्यक्रममा डिभिजन वन कार्यालय बाँकेका वन अधिकृत सुशील सुवेदी, बास नेपालका केन्द्रीय अध्यक्ष शिवकुमार वर्मा, निर्देशक हेमराज भट्ट, कोहलपुर नगरपालिकाका प्रमुख प्रशासकीय अधिकृत मानबहादुर गिरी, नगर प्रहरी प्रमुख तथा वातावरण शाखा प्रमुख वीरबहादुर थापा लगायत विभिन्न सरकारी तथा गैरसरकारी निकायका प्रतिनिधिहरूको उपस्थिति रहेको थियो।
कार्यक्रमका वक्ताहरूले वातावरण संरक्षणका लागि सरकारी निकाय, स्थानीय तह, विद्यालय, समुदाय र नागरिक समाजबीच सहकार्य आवश्यक रहेको औँल्याउँदै वातावरणीय चुनौतीहरूको सामना गर्न सामूहिक प्रयास अपरिहार्य रहेको बताएका थिए।
विश्व वातावरण दिवसको अवसरमा आयोजना गरिएको उक्त सडक नाटकले वातावरण संरक्षणप्रति नागरिकमा सकारात्मक सन्देश प्रवाह गर्नुका साथै वातावरणमैत्री व्यवहार अपनाउन प्रेरित गरेको सहभागीहरूले बताएका छन्।
About the Author
