२० मंसिर। म्याग्दीका सुन्तला बगैचामा फैलिएको औँसा कीराको प्रकोपको निरिक्षणको लागि कृषि ज्ञान केन्द्र म्याग्दीले स्थलगत निरिक्षण सुरु गरेको छ । कार्यालयका कृषि प्राविधिकहरुको टोलीलाई परिचालन गरि औँसा कीराको प्रकोपको अबस्थाबारे अध्ययन गर्न लागिएको हो ।
म्याग्दीका सुन्तलामा औँसा कीराको प्रकोपले पाक्ने समयमा बोटका पँहेला भएका सुन्तला झर्ने समस्या धेरै बढेको छ ।म्याग्दी जिल्लाको बेनी नगरपालिका, रघुगंगा, अन्नपुर्ण, मंगला, मालिका र धवलागिरि गाउँपालिकामा यस बर्ष विक्रि हुने समयमा सुन्तलामा औँसा कीराको प्रकोप देखिएको हो ।
कृषि ज्ञान केन्द्र म्याग्दीले जिल्लामा सुन्तला बगैचाहरुमा औसा किराको प्रकोप बढेपछि कृषकहरुको बगैचामै पुगेर रोकथामको लागि कृषकहरुलाई सल्लाह दिने र वास्तविक अबस्थाको तथ्याङ्क लिने र अबस्था बुझ्न थालेको कार्यालयका कृषि प्रसार अधिकृत गोविन्द पाण्डेले अन्लाइओन खबरलाइ जानकारी दिनुभयो । उहाँले पहिलो चरणमा कृषकहरुलाई झरेका फललाई व्यवस्थित व्यवस्थापन गर्न समेत आग्रह गरिएको र कार्यालयको तर्फबाट आबश्यक पर्ने प्लाष्टिक झोला निशुल्क उपलब्ध गराईएको बताउनु भएको छ ।
झरेका फलहरुबाट अन्य बोटमा समेत औँसाका किराहरु फैलने भएकाले कार्यालयले झरेका फलहरुलाई छिटोभन्दा छिटो व्यवस्थापन गर्न अनुरोध गरको छ । जमिनको सतहबाट १ फुट गहिरो खाडल खनेर प्लाष्टिकको झोलामा राखेर माटोले पुर्नुपर्ने कृषि विज्ञहरुको भनाई छ । कार्यालयले स्थलगत रुपमा कृषकका बगैँचामा पुगेर प्रकोपको अध्ययन र निरिक्षण गरेको र फल टिपीसकेपछि रोकथामका लागि आबश्यक कदम चाल्ने योजना बनाएको जनाईएको छ । तत्काललाई औँसा लागेर झरेका फललाई व्यवस्थापन गर्ने र आगामी बैशाख, जेठ, असारमा वयस्क झिंगा व्यवस्थापनका लागि प्रोटिन बेटमा आधारित क्षेत्रगत कीरा नियन्त्रण कार्यक्रम सञ्चालन गरिने कृषि ज्ञान केन्द्रले जनाएको छ ।
सुन्तलाको व्यवसायिकरणमा सघाउन जोन परियोजना कार्यान्वयनमा ल्याईएको भएपनि रोक र संक्रमण व्यवस्थापनमा परियोजनाले ध्यान नदिएको कृषकहरुको गुनासो छ । जिल्लाको ६ वटै स्थानीय तहको ७ सय ६ हेक्टर जमिनमा सुन्तला खेती विस्तार भएको छ । गत बर्ष २ हजार ४ सय १२ मेट्रिक टन सुन्तला उत्पादन भएको थियो । गत बर्ष समेत सुन्तलामा लागेको औसाको प्रकोप यस बर्ष थप बढेको छ । पाक्न लागेका सुन्तला झर्न थालेपछि यस बर्ष जिल्लामा ३० देखि ४० प्रतिशतसम्म सुन्तला उत्पादनमा गिरावट आउने अनुमान समेत गरिएको छ ।