२६ फागुन, काठमाडौं । मोरङ गछियामा विभिन्न दल परित्याग गरी युवाहरु राष्ट्रिय प्रजातन्त्र पार्टी (राप्रपा) मा प्रवेश गरेका छन् ।
वर्तमान परिवेशमा राप्रपाको नीति र सिद्धान्त आवश्यक रहेको भन्दै राप्रपा प्रवेश गर्ने १५७५ जना युवाहरुले राप्रपाको सदस्यता बिहिवार ग्रहण गरे ।नवप्रवेशी युवाहरुलाई हार्दिक स्वागत गर्नु हुदै पार्टी अध्यक्ष राजेन्द्र लिङ्देनले राप्रपामा स्वागत गरे ।
‘राजा सहितको प्रजातन्त्र उन्नत प्रजातान्त्रिक पद्धति हो । नर्वे, डेनमार्क, बेलायत, जापान, क्यानाडा जस्ता देश सहितका विश्व अभ्यास र अनुभवले प्रमाणित गरेको यथार्थ हो।
आजको सन्दर्भमा युवा तरुणले नेपालमा यो सत्य र आवश्यकतालाई आत्मसात गरेका छन्,’ राप्रपाका पार्टी अध्यक्ष राजेन्द्र लिङ्देन मोरङको सुन्दर हरैंचामा आज आयोजित पार्टी प्रवेश तथा आमसभा कार्यक्रममा बोल्दै लिङ्देनले सुशासनका लागि, जनताप्रति उत्तरदायी बन्नका लागि र देशहितमा काम गर्नका लागि उम्मेदवारले अनिवार्य रूपमा कसम खानुपर्ने बताएका हुन् ।
‘राप्रपाको टिकट लिन आउनुभन्दा अगाडि आफ्नो निर्वाचन क्षेत्रको कुनै पनि ठाउँको मन्दिरमा गएर कसम खाएर आउनु पर्नेछ,’ लिङ्देनले भने । कार्यक्रममा बोल्दै राप्रपाका नेता ज्ञानेन्द्र शाहीले भ्रष्टाचारीलाई पार्टीले कहिल्यै पनि टिकट नदिने घोषणा गरे । उनले जनताबाट प्रत्यक्ष निर्वाचित कार्यकारी प्रधानमन्त्री हुनुपर्नेमा जोड दिएका थिए ।
यस्तै शाहीले भ्रष्टाचारको अन्त्य गर्नका लागि संघीयता प्रदेशको खारेजी प्रमुख शर्त रहेको कुरामा जोड दिएका थिए । सोही कार्यक्रममा मन्तव्य दिँदै राप्रपाकी नेतृ तथा अभिनेत्री रेखा थापाले नारीलाई शिक्षाका लागि, स्वास्थ्यका लागि विशेष जोड दिनुपर्ने बताइन् । उनले अहिलेका नेताहरूले पटक पटक देशलाई बर्बाद पारेको र अब नेपाललाई अगाडि बढाउन नेपालवाद र नेपाली माटो सुहाउँदो नयाँ सिद्धान्त जन्माउन राप्रपा लागेको बताएकी छिन् ।
