२९ वैशाख, काठमाडौं । विपक्षी गठबन्धनले बहुमत पुर्याउन नसकेपछि गण्डकी प्रदेशमा एमाले संसदीय दलका नेता पृथ्वी सुब्बा गुरुङ पुनः मुख्यमन्त्री बन्नु भएको छ ।
यसअघि पनि दुई तिहाई बहुमतको मुख्यमन्त्री बनेका गुरुङ अहिले भने अल्पमतको दलको मुख्यमन्त्री बनेका हुन् । अपरान्ह ४ बजेअघि विपक्षी चार दलले गठबन्धनको दाबी सहित प्रदेश प्रमुखको कार्यालयमा पत्र दर्ता गरेपनि जनमोर्चाभित्रको विवादका कारण प्रदेश प्रमुखले त्यो दाबीलाई अस्वीकार गरेकी छिन् ।
प्रदेश प्रमुख सीता पौडेलले प्रदेश सभाको ठूलो दल एमाले संसदीय दलका नेता गुरुङलाई सरकार गठन गर्न आह्वान गरिसकेकी छिन् ।
अहिले प्रदेश प्रमुखको कार्यालयमा मुख्यमन्त्री गुरुङको सपथग्रहणको तयारी भैरहेको छ ।
गुरुङले यही वैशाख २६ गते पदबाट राजीनामा दिएका थिए । संविधानको धारा १६८ को उपधारा ३ अनुसार संसदमा ठूलो दलको हैसियतले सरकार बनाउन लागेका गुरुङले एकमहिनाभित्र प्रदेशसभामा विश्वासको मत लिनुपर्छ ।
