काठमाडौं १९ माघ । नुवाकोटमा नेकपा ओली समूह र पुष्प कमल दाहाल ‘प्रचण्ड’–माधव कुमार नेपाल समूहबीच झडप भएको छ । झडपमा प्रचण्ड –नेपाल समूहका ५ जना कार्यकर्ता घाइते भएका छन् ।
ओली समूहले आयोजना गरेको कार्यक्रमलाई सम्बोधन गर्न उपप्रधानमन्त्री इश्वर पोखरेल, उद्योग वाणिज्य तथा आपुर्ति मन्त्री लेखराज भट्ट, प्रधानमन्त्रीका सल्लाहकार बिष्णु रिमाल नेता नुवाकोट पुगेका थिए ।
उपप्रधानमन्त्री इश्वर पोखरेलसँगै आएको एउटा गाडी झडपका क्रममा तोडफोड गरिएको छ । तोडफोडबाट गाडीको शिशा फुटेको छ। पोखरेलको गाडीमा सामान्य क्षति पुगेको छ । उद्योग वाणिज्य तथा आपुर्ति मन्त्री भट्टको स्वकीय सचिव मिनबहादुर सिंह चढेर आएको एक संस्थानको गाडीको पछाडि भागमा भने पूर्ण क्षति पुगेको हो ।
